Русија му се закани на Западот, предупредувајќи дека „развива широк опсег на акции против санкциите кои ќе бидат брзи и ќе се почувствуваат во најчувствителните области на Западот“, објави Ројтерс.
Руската економија се соочува со најлошата криза од 1991 година, по распадот на Унијата, кога Западот воведе строги санкции за речиси целиот руски финансиски и корпоративен систем.
Санкциите беа предизвикани од руската инвазија на Украина. „Рускиот одговор ќе биде брз, добро обмислен и чувствителен на оние што ги таргетира“, рече Дмитри Биричевски, директор на одделот за економска соработка на Министерството за надворешни работи.
Русија претходно оваа недела предупреди дека цената на нафтата може да скокне на над 300 долари за барел доколку САД и Европската унија го забранат увозот на сурова нафта од Русија. Русија вели дека Европа троши околу 500 милиони тони нафта годишно. Русија испорачува околу 30% од тоа, или 150 милиони тони, како и 80 милиони тони петрохемикалии.
Рускиот претседател Владимир Путин изјави дека „специјалната воена операција“ е важна за да се обезбеди безбедноста на Русија бидејќи САД имаат намера да го прошират источното крило на НАТО и да го поддржат прозападниот режим во Киев.
Украина вели дека се бори за своето постоење, а САД и нивните европски и азиски сојузници ја осудија руската инвазија.
Кина, втората по големина економија во светот, повика на воздржаност, но претседателот Си Џинпинг предупреди дека санкциите ќе ја забават светската економија.
Од своја страна, Турција изјави дека економските санкции на Западот против Русија поради настаните во Украина ќе имаат „страшно“ влијание врз светскиот пазар на нафта, изјави турскиот заменик министер за енергетика и природни ресурси Алпарслан Бајрактар. Тој додаде дека Турција нема да се откаже од увозот на руска нафта и гас.
Според него, со крајот на пандемијата на коронавирус и закрепнувањето на светската економија, од земјите се бара да го зголемат производството на нафта. „Заменувањето на руската нафта на светскиот пазар ќе биде многу тешко. „Русија е најголемиот светски производител на нафта“, рече Бајрактар.